05 / 07

NU SUONNO

di Franco Scalese

L'ata matina quanno me so aizato

aggio araputa 'a porta chiano chiano

e annanzi alluocchie mie m'e accumparuta 

nascosta tra na ceppa e rose e gigli

a forma e na persona canusciuta.

A passi lieggi e senza avè paura

me songhe avvicinato a stà signora

e quanno sò arrivato a stà visione

aggio riconosciuto mamma mia.

Purtava nu vestito prufumato

cu mille fiori bianchi mise n'coppa

pò co surriso suje doce e garbato

mà fatto na carezza e mà parlato.



Ma ditto cu nu filo filo e voce

cò paraviso esiste overamente, 

stanno tanti ciardine prufumate

e che fa caldo comm'é ccà l'estate. 

Ce stanno pò 'e creature ca sò belle 

e 'o cielo brilla e nu migliaro e stelle. 

Nun ce sta cattiveria, nun c'e guerra 

e Il'ancme nun pensano cchiù a terra. 

Tutto se move cu tanta dulcezza

llà regna sulo ammore e tenerezza. 

Tutt'à n'drasatte dint'à stà parlata

na voce differente aggio sentuto, 



nà voce meno doce cchiù reale

ca m'à lasciato sulamente muto.

Stà voce me diceva cu pacienza

ca s'era fatte tardi: "nun durmì"... 

So stato nà mez'ora frasturnato

"e stato tutt'avere o aggio sunnato"? 

Na cosa sola me fa nustalgia

aggio sentuto ancora mamma mia..